Мақұлбек Балбала Мақсұтханқызы «Дипломатиялық протокол және этикет» пәнінен ашық сабақ өткізді

2026 жылдың 16 қазанында Л.Н. Гумилев атындағы Еуразия ұлттық университетінің Халықаралық қатынастар факультетінде 2-курс магистранты Мақұлбек Балбала Мақсұтханқызы «Дипломатиялық протокол және этикет» пәні бойынша «Ту протоколы» тақырыбында ашық сабақ өткізді. Семинар форматында ұйымдастырылған сабаққа «6В03102 – Халықаралық қатынастар» білім беру бағдарламасының В140-3102-24-05 тобының студенттері қатысты. Ғылыми жетекшісі – Л.Н. Гумилев атындағы Еуразия ұлттық университетінің Халықаралық қатынастар кафедрасының меңгерушісі, PhD докторы, доцент міндетін атқарушы Кенжалина Гульсум Жұмабайқызы.

Сабақтың мақсаты – студенттерге халықаралық дипломатиялық тәжірибедегі ту протоколының негізгі қағидаттарын, мемлекеттік туларды орналастыру тәртібін және оларды ресми іс-шараларда қолданудың құқықтық әрі саяси ерекшеліктерін ғылыми-теориялық тұрғыдан түсіндіру. Сонымен қатар студенттердің халықаралық құқық нормаларын талдау, дипломатиялық протокол ережелерін нақты жағдайларда қолдану, мемлекеттердің егемендік теңдігі қағидатын түсіну және протоколдық даулы мәселелер бойынша кәсіби шешім қабылдау дағдыларын қалыптастыру көзделді.

Сабақ барысында ту протоколының халықаралық қатынастардағы рөлі, мемлекеттік рәміздердің дипломатиялық маңызы және ресми кездесулер мен халықаралық ұйымдар аясындағы туларды орналастыру ерекшеліктері қарастырылды. Студенттер 1961 жылғы Дипломатиялық қатынастар туралы Вена конвенциясының 20-бабын, Біріккен Ұлттар Ұйымының Ту кодексін (ST/SGB/2020/4), БҰҰ Жарғысында бекітілген мемлекеттердің егемендік теңдігі қағидатын және БҰҰ Бас Ассамблеясының 2015 жылғы 69/320 қарарын талқылады. Аталған құжаттар негізінде ту протоколының құқықтық, саяси және символдық қырлары салыстырмалы түрде қарастырылды.

Сабақта проблемалық жағдаяттарды талдау, топтық жұмыс, пікірталас, сұрақ-жауап, дипломатиялық модельдеу және интерактивті тестілеу әдістері қолданылды. Студенттер мемлекеттік тулардың орналасуы халықаралық құқық, саяси мәртебе және дипломатиялық тану мәселелерімен қалай байланысатынын талқылады. Атап айтқанда, БҰҰ Бас Ассамблеясының 69/320 қарары мысалында бақылаушы мемлекеттердің туларын орналастыру мен мемлекеттер тарапынан дипломатиялық тану ұғымдарының айырмашылығы қарастырылды. Сабақтың қорытынды кезеңінде студенттердің меңгерген білімдерін бағалау мақсатында он сұрақтан тұратын интерактивті викторина ұйымдастырылды.

Сабақ қорытындысы бойынша студенттердің ту протоколы, мемлекеттік рәміздерді халықаралық деңгейде қолдану, дипломатиялық рәсімдердегі құқықтық нормалар және протоколдық келіспеушіліктерді шешу тәсілдері туралы білімдері жүйеленді. Ашық сабақ студенттердің сыни ойлау, халықаралық-құқықтық талдау, командалық жұмыс, кәсіби коммуникация және дипломатиялық шешім қабылдау дағдыларын дамытуға ықпал етті. Семинардың интерактивті және тәжірибеге бағытталған форматы теориялық білімді нақты дипломатиялық жағдаяттармен ұштастыруға мүмкіндік берді.